კატეგორია: სიახლეები

ბუბუ და კორეა: ნაწილი 23 – ვივაჭროთ სეულში

დიდი ხანია პოსტი არ დამიწერია რახან არდადეგები მქონდა და სამეცადინო – არა.
ახლა აგიხსნათ როგორ უნდა შეევაჭროთ ხოლმე გამყიდველებს, განსაკუთრებით – ასაკოვან ხალხს.
პირველ რიგში, უნდა დაიმახსოვროთ, რომ დიდ მარკეტებში, სადაც ფასები აწერია პროდუქტს, 99% დარწმუნებულები იყავით რომ შევაჭრება არ მოსულა. და საერთოდ, რატომ მიდიხართ ისეთ ადგილას, სადაც ყველაფერს ფასი აწერია? ადექით თქვენც კიდე და, რაღა ბევრი გავაგრძელოთ, გადით გარეთ, სადაც ბებიები ხილს, ბოსტნეულს, ხორცს და ყველაფერ კარგს ყიდიან, თან არჩევენ ნიორს, თუ რაც იქნება. (მეტნაკლებად) გრძელვადიან პერსპექტივაში იმდენ ფულს დაზოგავთ, ახლა ცოტათი ვნანობ იმ ხილ-ბოსტნეულს, რაც მარკეტში მიყიდია. ისიც დაიმახსოვრეთ, რომ ბებიებისგან ნაყიდი ყველაფერი უფრო გემრიელია. თუ ფასდაკლების მაძიებელი ხართ, ასეთი მიდგომაა კარგი: ეუბნებით მოგცეს ფორთოხალი, მაგალითად (საქართველოში მაგალითის მოყვანისას ვაშლს გამოვიყენებდი, მაგრამ აქ ვაშლს აღარ ვჭამ ხოლმე). ხომ გაიგებთ ამის ფასს? შემდეგ სთხოვთ ,რომ მაგ ფასში ეგ ფორთოხლებიც მომეცი და ორი-სამი მანდარინიც გაიმეტე-თქო. უარს არავინ გეტყვით (იმედია) :D

მარწყვი ძალიან ძვირია და გემოც არ უვარგა ჩემი აზრით. ამიტომ არ გირჩევთ მაინცდამაინც. რით ვერ ვნახე წესიერი მარწყვი?

კორეაში ვაჭრობის დროს ყველა იყენებს ბარათს. თითქმის ყველა იყენებს მხოლოდ ბარათს. მაგრამ ხანდახან შეიძლება ფასდაკლებასაც გამოჰკრათ ხელი, თუ ნაღდ ფულს გადაიხდით. თითქმის 87% შემთხვევაში დაგიკლებენ (პროცენტული მაჩვენებელი დადგენილია წარმოსახვის უნარის მეშვეობით). თუკი გინდათ უკეთესი შედეგი, ჯერ ფასი ჰკითხეთ და მერე თავად შესთავაზეთ ახალი ფასი, ოღონდ ნაღდ ფულს მოგცემო, უთხარით. მაგალითად, ყიდულობ მაიკას, გეუბნებიან 10 ათასი ვონი ღირსო (ანუ დაალოხებით 9-10 დოლარი). უთხარით, ნაღდი ფულით რომ მოგცე 7 დოლარად ხომ გამატანო? კაი ბლომად შეიძლება დააკლებინოთ ასე. ნუ, ფასის განახევრებაც შეიძლება სცადოთ, რა იცი რა ხდება :D
არ უნდა გამოგრჩეთ, რომ ვთქვათ და ისეთ ადგილას ხართ, სადაც ყველაფერს ფასი აწერია (რატომ უნდა წახვიდეთ აქ არ ვიცი მაგრამ… დავუშვათ რომ ხართ). დააკვირდით რაზე არის აქციები და რაზე – არა. საქართველოსთან შედარებით, უამრავ პროდუქტზეა ხოლმე 1+1 ან 2+1 აქცია, რომლებიც რამდენიმე დღე გრძელდება ხოლმე.
უბნების მიხედვით თითქმის ყველაფერს შეიძლება სხვადასხვა ფასი ჰქონდეს, ამიტომ წინასწარ გაგება არაა ცუდი. კარგი ვარიანტია, რისი ყიდვაც გინდათ, იმის ფასების წინასწარ გაგება და მერე ფასის შეთავაზება (თან ნაღდი ფული დაანახეთ, იქნებ მეტ-ნაკლებად თავის მომსაწყლებელი, მაგრამ ცოტაოდენ მზაკვრული ღიმილიც გამოგადგეთ, ვინ იცის…).
მოკლედ აქამდე რაც დავწერე ყველაფერი რომ შევაჯამოთ, იქნება 2 სიტყვა: ნ ა ღ დ ი და ფ უ ლ ი. რათ უნდოდა ამას ამდენი ბოდიალი?!

ყველაზე ცნობილი სავაჭრო ცენტრები და ბაზრები:

1) 광장시장 – გვანგჯანგშიჯანგი: კორეული ტრადიციული სტილის ბაზრობა. იყიდება ყველაფერი საჭმელი გინდა თუ ჰანბოკი გინდა.

2) ნამდემუნის მარკეტი – 남대문 시장. მარკეტი ეძახე შენ და იმხელაა რომ…

3) გიყვართ თევზეული? 노량진 수산시장 – ნორიანგჯინის თევზეულის მარკეტს ეწვიეთ:

თევზის სუნია ისეთი… თევზი გინდა, რვაფეხა გინდა, კიბორჩხალა გინდა თუ კრევეტები?

4) დონგდემუნის მარკეტი – უზარმაზარი სავაჭრო ცენტრია. აქ ღამითაც შეიძლება საყიდლებზე სიარული. საქონელი ყოველთვის გამოტანილია “მზეზე”.

თუ ამ შენობებს დაინახავთ, ესე იგი უნდა მოემზადოთ სავაჭროდ.

5) ტექნიკის ყიდვა მინდაოოო? მაშ დაადექი იონგსანის გზას: 용산 시장:

ძალიან დიდია იონგსანის მარკეტი. ახალიც იყიდება და ნაქონიც. ძველიც და ახალიც. სულოგულო

6) ბეეეეეევრი სუვენირები სად ვიშოვოო? ჰაჰ – წადი ძმობილო ინსადონგზე – 인사동 – მაგრამ არაა ძალიან იაფი. კიარადა მეძვირება საერთოდაც. ნამდემუნზეც არის სუვენირები, არც ისე დიდი ინტენსივობით, თუმცა უფრო იაფად.

გარდა ჩამოთვლილი ადგილებისა კიდევ უამრავი ცნობილი კარგი სავაჭრო ზონა არის სეულში. ახლა კიდევ ლოტე (Lotte) აშენებს რაღაც გრანდიოზულ მონსტრს (롯데월드 타워). ჯერ შენების პროცესშია, მაგრამ ძალიან მაღალია. რომ ვნახე ავღფრთოვანდი. ვინ იცის, იქნებ მაქაც შეძლოთ ვაჭრობა? თუ სვაჭრო ზონა გახსნეს, რა თქმა უნდა. და გახსნიან კიდეც. ჯერჯერობით 70 სართულიც არაა აშენებულიო, გავიგე. სულ 120 საერთული იგეგმება დაახლოებით.

ამ შენობას რომ ვუყურებ ჩემში იღვიძებს დამალული არქიტექტორი.

ჯერ მილიონრები გავხდეთ და მერე ვივაჭროთ აქ. როდის იყო ლოტეს რამე იაფად გაუყიდია?
მოკლედ სულ ეს იყოს ჯერჯერობით. ამ თემას ვასრულებ შემდეგი სიმღერით, ფულის სიძვირის შესახებ: (მადლობა ჩიბი ამ ჯგუფის შესახებ რომ მამცნე).

იანვარი 6, 2015
ბუბუ და კორეა: ნაწილი 22 – ტოგუგი

და კიდევ ერთი გემრიელი პოსტის დროც დადგა!
ვისაც ჩემი პოსტები წაგიკითხავთ და გახსოვთ, იქნებ არც ის დაგვიწყებოდათ, თუ როგორ მიყვარს დოლსოტ ბიბიმბაბი. მაგრამ ჩემს გულში (თუ კუჭში) ერთ სხვა კორეულ კერძსაც დიდი ადგილი უჭირავს.
რა ხდება? ნუთუ მე ვუღალატე დოლსოტ ბიბიმბაბს და რაღაც თეთრ მასაზე გავცვალე? ო, არა. დოლსოტ ბიბიმბაბი ისევე მიყვარს, როგორც მიყვარდა, თუმცა ძალიან დავუახლოვდი ერთ კერძს, სახელად ტოგუგს.
ამ საიტზე ერთხელ უკვე იყო ტოგუგის შესახებ საუბარი, თუმცა ამჯერად პირად გამოცდილებას გაგიზიარებთ.
მე ტოგუგის შესახებ ოდითგანვე მსმენოდა, მაგრამ შეხვედრის შანსი არ მქონია. ამიტომაც ერთ დღეს ჩემს კორეელ “დამხმარეს” ვთხოვე ერთმანეთი გაეცნო ჩვენთვის, რახან ჩემით არ შემეძლო. ძალიან მორცხვი ვარ. პირველივე კოვზის შემდეგ შემიყვარდა.
ცოტა სერიოზულად განვაგრძოთ საუბარს, თორემ საკუთარ თავს ვერ ვცნობ. მოკლედ ტოგუგი არის დაჭრილი ბრინჯის ნამცხვრისგან გაკეთებული წვნიანი, რომელშიც შეიძლება შედიოდეს კვერცხი, კიმი (კიმჯაბანი), პილპილი და ა.შ. ხანდახან მანდუსაც შეიცავს (მანდუ არის პელმენისმაგვარი კორეული საჭმელი), მანდუიანი ტოგუგს მანდუტოგუგსაც ეძახიან და ტოკმანდუგუგსაც. სახელს დიდი მნიშვნელობა არ აქვს ახლა, დიდი ალბათობით მალევე დაგავიწყდებათ ასეთი ჩახლართული სახელები :D

ტოგუგის ჭამა ტრადიციად იქცა ახალ წელს. ითვლება, რომ თუ ტოგუგს შეჭამ, ერთი წელი მოგემატება. ეს ყოველივე იმასთანაცაა დაკავშირებული, რომ კორეაში ასაკს ცოტა სხვაგვარად თვლიან: ახალ წელს ყველას ავტომატურად ემატება ერთი წელი, და არა დაბადების დღეს. კორეული ენის წიგნში ერთი “ანეგდოტი” შეგვხვდა: 30 წლის ქალი თავს 26 წლისად ასაღებდა ერთი კაცის წინ, რახან 26 წელი რაც შეუსრულდა, იმის შემდეგ ტოგუგი არ ჰქონდა ნაჭამი. მასწავლებელმა გაგვაფრთხილა, რომ ეს ანეგდოტი არსად გვეთქვა, თუკი არ გვინდოდა საზოგადოებიდან გარიყულები ვყოფილიყავით. როგორც ჩანს ეს ზედმეტად გაცვეთილი უძველესი “ანეგდოტია.” როგორც მახვილგონიერი მკითხველი, შენიშნავთ, აბა სადაა მანდ ანეგდოტიო. გაცინება კი არა, არც გამიღიმიაო. ოჰ, ეს კორეული იუმორი (ㅋㅋㅋ).

ამ სურათზე თქვენ უყურებთ ტოკს. ტოკი არის ბრინჯის ნამცხვარი, რომელსაც ზემოთმოყვანილი სურათის მსგავსად ჭრიან და ისეთი წვნიანი გამოდის, ექვსს თუ არა, ხუთ თითს მაინც ჩაატანთ. სიტყვა “ტოგუგი” მოდის სიტყვისგან “ტოკ” (რაც ბრინჯის ნამცხვარს ნიშნავს და ბოლო ასო “კ” ვარდება ტოგუგიდან, რახან კორეულში ასო “გ”-ს წინ “კ” არ იკითხება) და “გუგ” (რაც წვნიანს ნიშნავს). მთელი ფილოსოფიაა, აბა!

არც ტოგუგია გამონაკლისი და მასაც სხვადასხვა დასაყოლებლებთან ერთად მიირთმევენ, მაგრამ მემგონი ერთადერთი კორეული კერძია ჩემთვის, რაზეც დასაყოლებლებს არ ვატან. არ უხდება ჩემი აზრით და მომკალით ახლა (ვინ მკლავს რო). არ შეგაცდინოთ ზემოთა სურათმა, ტოგუგთან ერთად ბრინჯი იშვიათად მოაქვთ.

რა შეიძლება გითხრათ საბოლოოდ, კორეული სამზარეულო ვისაც აინტერესებს ერთხელ აუცილებლად უნდა გასინჯოთ. ეს ისეთი კერძი არაა, რომ ყოველ მეორე მოსახვევში შეხვდე, როგორც კიმბაბი ან ბიბიმბაბი. მაგრამ არის სპეციალურად ტოგუგით ცნობილი რესტორნები, სადაც ერთი შევლა ერთი ცხოვრების ტოლფასია. ყველაზე იაფი 6000 ვონი ღირს (დაახლოებით 6 დოლარი) და ფასები მერყეობს რესტორნის პრესტიჟის მიხედვით. ყველაზე ძვირი 9000 ვონიანი მიჭამია. მაგრამ ეგ იყო ნ ე ტ ა რ ე ბ ა.

ახლოვდება ახალი წელი და, რა თქმა უნდა, მადაც იმატებს. იმდენი ტოგუგი მაქვს უკვე ნაჭამი, ბებრი თუ არა, ხანშიშესული ქალბატონი მაინც უნდა ვიყო აწი. მაშ გემშვიდობებათ ქალბატონი ბუბუ და რაიმე გემრიელ პოსტს კიდევ ერთხელაც დავწერ.

ნოემბერი 29, 2014
ბუბუ და კორეა: ნაწილი 21 – კორეული საიტები და აპლიკაციები

ახლა შემოგთავაზებთ პატარა პოსტს კორეული საიტების შესახებ. არ იქნება დიდი პოსტი და ვინც კორეული ენით/კორეაში ჩამოსვლით არაა დაინტერესებული არამგონია რამეში გამოგადგეთ. უბრალოდ მინდა შთამომავლობას დავუტოვო კორეაში დაგროვებული სიბრძნე :D ჯერჯერობით ესაა სია კორეული საიტებისა, რომლებითაც აქტიურად ვსარგებლობ. შენიშვნა: საიტების უმრავლესობა არის კორეულ ენაზე. ამიტომ გითხარით, თუ კორეული ენით დაინტერესებულნი არ ხართ, არ გამოგადგებათ-მეთქი.

1) http://www.naver.com/ < მემგონი ყველაზე ცნობილი კორეული საიტია. კორეაში GOOGLEს ყველა იყენებს, როგორც საძიებო სისტემას, მაგრამ არის სხვა ცნობილი ვარიანტებიც და ნეივერი ერთ-ერთი მათგანია. სიახლე, ამინდის პროგნოზი, სპორტი, ფილმები და ა.შ. მოკლედ ყველაფერი აქაა. განსაკუთრებით მინდა აღვნიშნო ლექსიკონი /endic.naver.com რომლის გამოყენებაც ჯერ კიდევ საქართველოში დავიწყე და სხვა ლექსიკონისკენ არც გამიხედია, ძალიან მაკმაყოფილებს.

ეს ნავერის ძალიან მოკლე მიმოხილვა იყო. შეიძლება ბევრი ჯერ კიდევ ჩემთვის უცნობი ფუნქციის მატარებელი საიტი იყოს.

2) http://www.daum.net/ <

ნეივერის მსგავსი საძიებო სისტემა, თუმცა არის განსხვავებებიც. მთავარი რაც მინდა ავღნიშნო ისაა, რომ ოფიციალური ფან-კლუბები სწორედ დაუმზეა გახსნილი. დიახ, დიახ, ზუსტად რომ ჩვენი საყვარელი კორეელი შემსრულებლების ოფიციალური ფანკლუბები. აქ უახლეს ინფორმაციას მიიღებთ თქვენი საყვარელი ჯგუფების შესახებ, სად და როდის მიდიან, როდის რა ღონისძიება აქვთ და ა.შ. ამ ფან-კლუბებში გაწევრიანება უფასოა, თუმცა ზოგჯერ აუცილებელია ხოლმე სახელის და გვარის, დაბადების თარიღის და კორეული ტელეფონის ნომრის მითითება, რომ ფან-კლუბის წევრი გახდე. აქვე ვიტყვი, რომ არსებობს ფასიანი ფან-კლუბებიც, ოღონდ არა დაუმზე. არა-დაუმის ოფიციალური უფასო ფან-კლუბებიც არსებობს, მაგრამ ესენი ცოტა განსხვავებულია. ორივე ოფიციალური კი არის, მაგრამ, თუ ფულს იხდით ფან-კლუბის წევრობაში, მეტი პროვოლეგია გექმნებათ (რა პრივილეგიებზეა საუბარი განსხვავდება ჯგუფებისდა მიხედვით). ჯერჯერობით კი გავწევრიანდი მრავალ დაუმის ფან-კლუბში, თუმცა ოფიციალურ არა-დაუმის ფან-კლუბში არ გავწევრიანებულვარ. ერთადერთი 2NE1-ის ოფიციალურ ბლექჯექებში მინდოდა გაწევრიანება, მაგრამ არც ისე ადვილია. წელიწადის რომელიღაც დროებშია მარტო მიღება ამ ფან-კლუბებში, ანუ როცა მოგესურვება, შენს ნებაზე ვერ გაწევრიანდები. ასე რატომ არის, ზუსტად არ ვიცი, თუ გავიგე გამცნობთ.

დაუმზეა ასევე აუარება ვებტუნები, კორეის რუკები და ა.შ. არც დაუმით ვსარგებლობ მაინცდამაინც.

3) http://www.gmarket.co.kr/ ყველაზე დიდი საიტი ინტერნეტ-შოპინგისთვის. აქ ყველაფერი იყიდება. სინდისიც კი, სინდისიც იყიდება! არა, ჯერ სინდისი არ შემხვედრია (უხერხული ხველება). თუ თქვენდა გასაოცრად აღმოაჩინეთ, რომ რაღაც სპეციფიკურის ყიდვა გინდოდათ და ვერ იშოვეთ, მიადექით პირდაპირ ამ საიტს. მაგალითად, ლურჯი თმის საღებავის ყიდვა მინდოდა, მაგრამ ვერ მოვძებნე ვერსად, მოვიარე მთელი სეული. ბოლოს ისევ ამ საიტის შემწეობით შევძელი შოვნა. მანამდე არ ვიყენებდი, რახან გადახდის დროს პრობლემები მექმნებოდა, მაგრამ შემდეგ ჩემმა ოთახელმა ჯიმარკეტიდან რაღაცეების გამოწერის მეთოდი მასწავლა და მას მერე პრობლემა არ მქონია. თუ ვინმე ჩამოხვედით კორეაში და არ იცით როგორ გამოიყენოთ ეს საიტი, მომწერეთ და ვეცდები დაგეხმაროთ. პ.ს. ამ საიტს არ აქვს საზღვარგარეთ გაგზავნის სერვისი, მხოლოდ კორეაში აქვთ მომსახურება. საიტს ინგლისური ვერსიაც აქვს.

4) http://www.interpark.com/ ინტერპარკი ყველაზე ცნობილი საიტია ბილეთებისთვის. არ ვიცი საზღვარგარეთ გაგზავნის სერვისი აქვთ თუ არა, მემგონი არა. ამ საიტსაც აქვს ინგლისური ვერსია + ცალკე სისტემა შექმნილი უცხოელი მყიდველებისთვის. მინდა აღვნიშნო, რომ ეს უცხოელებისთვის განკუთვნილი სისტემა მაინცდამაინც ვერ დამეხმარა და ისევ კორეული ვერსიით ამაოდ ვცდილობ ხოლმე როგორმე ვინმეს დავასწრო ბილეთის ყიდვა და ადგილზე პირველმა დავა”კლიკ”ო. ბილეთებზე “ჩალიჩი” იდეაში არის ომი. ისეთი ომი აქვთ ხოლმე ფანებს გაჩაღებული, სისტემა ნელდება და ჭედავს ხოლმე. ამიტომაცაა იღბალი საჭირო. აქვე გეტყვით, ისეც ხდება, რომ ბილეთი ინტერპარკზე არ იყიდება და მხოლოდ ჯიმარკეტიდანაა გამოწერა შესაძლებელი.

5) http://www.netmarble.net/
ვის უყვარს თამაშები?

ნეტმარბლის მასკოტი კაი ტიპია.

ამ საიტზე ბევრ თამაშს ნახავთ, მინიკლიპის კორეული ვერსიაა ფაქტობრივად. მაგრამ, მე თუ მკითხავთ, უფრო დაპლიუსებული ვერსიაა. ბევრად სჯობს. მაინცდამაინც აქტიურად ვერ ვიყენებ, იმიტომ რომ დარეგისტრირებასთან დაკავშირებით პრობლემები მქონდა. მემგონი მოგვარდა ეს პრობლემები და აწი უკეთესად გავიცნობ ამ საიტს.

6) www.visitkorea.or.kr/ ამ საიტს კორეული ვერსიაც აქვს და ინგლისურიც. აპირებთ კორეაში სადმე სამოგზაუროდ წასვლას? ექსკურსიაზე მიდიხართ მაგრამ არ იცით თან რა წაიღოთ, როგორ წახვოდეთ ან რომელ საათებშია წასვლა ყველაზე კარგი? შედით ამ საიტზე და თქვენს თვალწინ გადაიშლება ყველა საჭირო ინფორმაცია.

7)

www.allkpop.com/ კორეული პოპის შესახებ სიახლეები. მემგონი კორეულ პოპს ვინც უსმენს ისედაც ყველამ იცით ეს საიტი, მაგრამ მაინც არ იქნებოდა ამის არ აღვნიშვნა. საიტი მხოლოდ ინგლისურ ენაზეა.

8) და ერთი მობილურის აპლიკაციით მინდა დავასრულო ეს პატარა პოსტი. ესაა KakaoTalk. საქართველოში არაა პოპულარული მაგრამ აზიაში, განსაკუთრებით კორეაში, ყველა იყენებს. ვაიბერის მსგავსი აპლიკაციაა, ოღონდ Viber-ს უფრო სერიოზული ინტერფეისი აქვს, კაკაოთოლქ-ს კიდევ – ონავრული. უამრავი emoticon-ები, საუბრის დროს ხმის შეცვლა შეიძლება და მოკლედ ათასგვარი ტინგიცობები აქვს. აქ მოხუცი ხალხიც აქტიურად იყენებს კაკაოს და მესიჯებსაც კაკაოსს გარდა სხვა მეთოდით თითქმის აღარავინ აღარ აგზავნის ჩემს გარდა :D მე ინტერნეტის გამოსაყენებელი ფული მენანება და ვარ ასე გარიყული საზოგადოებისგან :(

http://www.kakao.com/talk

დამატება:
9) http://www.baykoreans.net/
კინაღამ დამავიწყდა ეს უმნიშვნელოვანესი საიტი და მოკლედ დავამატებ. ამ საიტზე შეგიძლიათ უყუროთ ტელევიზიის ლაივ-სტრიმს უფასოდ, ასევე სხვადასხვა შოუების ჩანაწერებია, არის ფილმები, სერიალები, მულტფილმები, ანიმეები, მოკლედ ყველაფერი, რაც ტელევიზორში გადის ან გასულა. დარეგისტრირება არაა საჭირო ვიდეოების სანახავად, მაგრამ შეიძლება ზოგ-ზოგიერთ შემთხვევებში საჭირო იყოს მაინც.

ჯერჯერობით სულ ესაა. თუ რაიმე ცნობილი კორეული საიტი ან აპლიკაცია იცით, გაგვიზიარეთ ^_^

ოქტომბერი 23, 2014
ბუბუ და კორეა: ნაწილი 19 – ბიბიმბაბი (ჩემი საყვარელი კორეული საჭმელი)

დაიწყო შემოდგომაც და ახლა ის პერიოდია, დღე-დღეზე რომ უნდა ჩამერიცხოს სტიპენდია, მაგრამ ჯერ მაინც არ მაქვს. თქვენ წარმოდგინეთ ახლა, რაოდენ რთული და ასევე, სასიამოვნოა ჩემთვის ისეთ გემრიელ რამეზე საუბარი, როგორიცაა ბიბიმბაბი.
რატომ გადავწყვიტე მესაუბრა ბიბიმბაბზე მაინცდამაინც ახლა? თვის დასაწყისსა და შუა ნაწილში თითქმის ყოველ დღე (90%) ვჭამ ბიბიმბაბს. ფასი მერყეობს 4-6 ათას ვონს შორის (დაახლოებით 4-6 დოლარი), ჩემი საყვარელი ბიბიმბაბი კი 5.5 ათასი ვონი ღირს. ამიტომ თვის ბოლოს მაინცდამაინც ვერ ვეტანები ხოლმე. მაგალითად, ახლა 20 ათასი ვონი დამრჩა დაახლოებით, თან არ ვიცი ზუსტად, როდის ჩამირიცხავენ სტიპენდიას, რა იცი რა ხდება? ათასი რამ შეიძლება მოხდეს. ესაა ე.წ. “შავი დღისთვის” გადანახული ფული. ხოდა ჭამით თუ არა ვჭამ, დავწერო მაინც ამ რჩეულთა კერძის შესახებ. ბიბიმბაბის გამოა, აქამდე ბევრი კორეული საჭმელი რომ გაუსინჯავი დამრჩა. მენიუში თუ ბიბიმბაბი არის, ყველაფერი სხვა მავიწყდება.
პ.ს. ეს შესავალი რამდენიმე დღის წინ დავწერე და მაქვს ბედნიერება გამცნოთ ოჯახის წევრებს რომ შიმშილი დავასრულე ^_^ (party) ისე ზედმეტად სერიოზულ ხალხს (ბებო, შენ) გეუბნებით, რომ არ ვშიმშილობ, ისე კარგად ვჭამ, დიდ სეჯონგს შეშურდებოდა.

ბიბიმბაბი

მოკლედ ძალიან ბევრნაირი ბიბიმბაბი არსებობს, მაგრამ ამ პოსტში ვეცდები თავი არ შეგაწყინოთ და მარტო 2 სახეობის შესახებ მოვყვები, იმიტომ რომ ყველაზე მეტად მიყვარს. :ტირანი:
ესე იგი, პირველი არის ჩვეულებრივი ბიბიმბაბი, რომელსაც ზემოთა სურათზე ხედავთ. ინგრედიენტები სულ სხვადასხვაა და ასე ზუსტად გაწერილი რეცეპტი არ არსებობს. მაგრამ ძირითადად რაც მაქვს ბიბიმბაბებში შემჩნეული, ესაა ბრინჯი (აუცილებლად) კვერცხი (შემწვარი ან მარტო გული (შეუწვავი)), ქონგნამული (Bean sprout, არ ვიცი ქართულად რა დავუძახო), კიმი (კიმჯაბანი – kimjaban) აქვს ხოლმე დროგამოშვებით. წარმოუდგენელია ბიბიმბაბი სპეციალური საწებლის, გოჩუჯანის გარეშე. ეს საწებელიც სულ განსხვავებულია ხოლმე ადგილების მიხედვით და ბიბიმბაბს ცოტაოდენ სიცხარეს ანიჭებს, მაგრამ ამ ბოლო დროს მაგ სიცხარეს სულ ვეღარ ვგრძნობ. ხადახან ბიბიმბაბში კიტრსაც დებენ, ძროხის ხორციც არის ხოლმე ალაგ-ალაგ, სოკო, სტაფილო, სალათის ფურცლებიც და ა.შ. მოკლედ იმდენი რამეა შიგნით, დედა შვილს არ აიყვანს ხელში (wut).
ამდენი სხვადასხვა რამეა გამოყენებული იმ იდეალური და რჩეულთა წილხვედრი კერძის მოსამზადებლად, რომელსაც ბიბიმბაბი ჰქვია.

აი ინგრედიენტების მაგალითი (ბრინჯის, გოჩუჯანის (საწებელს ჰქვია), კვერცხის გარეშე

მაგრამ ჩვენი მსჯელობა კიდევ ერთ პრობლემას წამოჭრის, მეგობრებო! (ბოდიშით ხალხო, რაღაც დებატებთან დაკავშირებულ ვიდეოს ვუყურე ცოტა ხნის წინ). რატომ ჰქვია მაინცდამაინც “ბიბიმბაბი” და არა, მაგალითად, INSERT_NAME_HERE? იმიტომ, პატივცემულო მკითხველო, რომ სიტყვა ბიბიმბაბი (bibimbab, 비빔밥) არეულ საჭმელს ნიშნავს: 비빔 – არევა, 밥 – ბრინჯი, საჭმელი. ბრინჯი და საჭმელი ერთი და იმავე სიტყვა რომაა, არაა გასაკვირი. ჩვენთან თუ პურ-მარილია საქეიფო სიტყვა, აქ – ბრინჯ-მარილი იქნებოდა. პური აქაურ საჭმელს არ უხდება კი არა, ცალკეც კი ჭამენ საერთოდ, ხადახან (უკვე მეც ცალკე დელიკატესად ვჭამ პურსა).
მოიცა, მოიცა, მოიცა. ნუ მიბნევ გონებას მაგ შენი ბრინჯ-პურ-მარილითო, იტყვის ბებოია. რომ ამბობდი ბიბიმ (비빔) არევას ნიშნავსო, რაის არევაზე გაქვს ლაპარაკიო? მოიცა ბებოია, დამამთავრებინე სათქმელი. მეც კი მიჭირს აზრის დალაგება, ყველაფერი ერთად მინდა ვთქვა, მაგრამ არ გამოდის ასე. ერთი წინადადება ვერ გითქვამს ისე, რომ არ გაგკიცხონ, ისეთ დროში ვცხოვრობთ.

ასე ჩაპიწკინებულად დალაგებულ ინგრედიენტებს რომ უყურებთ სურათზე, ჯერ უნდა არიოთ და მერე ეს არეული გემრიელად შეახრამუნოთ. მე მინახავს ადამიანები, სილამაზის გულისთვის არ ურევენ და ისე თითო-თითოდ ჭამენ ინგრედიენტებს. მეთქი ძამია, თუ ბიბიმბაბი არ გინდოდა, გეყიდა ცალკე სტაფილო, ცალკე სოკო, ცალკე კვერცხი შეგეწვა, გიშლიდა ვინმე? უნდა აურიოთ. მესმის, თავიდან იფიქრებთ, რომ ინგრედიენტთა ასეთი ჰარმონიის დარღვევა დანაშაულია, მაგრამ წესრიგი ქაოსშიაო, ხომ გაგიგიათ. უნდა აურიოთ. აურიეთ კარგად და ისე შეჭამეთ, თორემ ჩემით მოვალ და აგირევთ ბიბიმბაბს. არ შეიძლება რა, ასეთი შანსის ხელიდან გაშვება. არ არევა და ისე ჭამა იგივეა, რაც ბიბიმბაბზე უარის თქმა! ესაა ბიბიმბაბის უარყოფა!
რაღა ბევრი გავაგრძელოთ და მეორე ბიბიმბაბი არის სუპერ-ულტრა-დელუქს-ტრიდე ჩემი უსაყვარლესი ბიბიმბაბის ნაირსახეობა, რომელსაც ჰქვია დოლსოტ ბიბიმბაბი – 돌솥비빔밥. ერთადერთი განსხვავება ისაა, რომ ბიბიმბაბს დებენ გახურებულ ჯამში, სულ ცოტა ხანი წვავენ (ცხადია, არევის გარეშე) და გახურებულჯამიანად მოაქვთ თქვენთან. დოლსოტ ბიბიმბაბი არის საოცრება. ძირითადად ცივ ამინდებში იციან ხოლმე ჭამა, რომ ადვილად გათბნენ, მაგრამ პაპანაქება სიცხეში ისე კარგად მივირთმევდი, თქვენი მოწონებული.

აი დოლსოტ ბიბიმბაბი. ყველაზე მეტად მიყვარს, როცა ჩვეულზე უფრო დიდხანს წვავენ ხოლმე. აი შეხედეთ შუაში რომაა, იმ სურათს. ასე მაინც უნდა აურიოთ, ქაოსმა უნდა დაისადგუროს და შემდეგ კარგად მოასუფთაოთ ჯამი. წარმოიდგინეთ, რომ ბებიასთან ხართ სტუმრად. ასეთი საჭმლის დატოვება ცოდვაა.

კორეაში მთავარ კერძთან ერთად ბევრ დასაყოლებლებსაც მიირთმევენ, არც ბიბიმბაბია გამონაკლისი. ალაგ-ალაგ კაი კიმჩის, კაი-კაი მოცხარო კიტრის და დამატებითი ქონგნამულის მიყოლება და ეგაა. არ დააყოლოთ გაზიანი სასმელები ან წვენები და ეგეთი ეშმაკის მანქანები! დააყოლეთ მხოლოდ წყალი. მხოლოდ ასე შეიგრძნობთ ნამდვილ ბიბიმბაბს. ამიტომაა, კორეულ პატარა რესტორანში რომ შეხვალ, კოკა-კოლა არ უნდა შეუკვეთო. და საერთოდ, სასმელის შეკვეთა არ შეიძლება ხოლმე. ალკოჰოლი შეიძლება დაგხვდეთ. მაგრამ ჩემი რჩევა იქნება, ბიბიმბაბს და, განსაკუთრებით, დოლსოტ ბიბიმბაბს, არ დააყოლოთ ალკოჰოლი. ასიამოვნეთ თქვენს თავს.
დიდი სურვილი მაქვს რომ მეტმა ქართველმა შეძლოს ბიბიმბაბის დაგემოვნება. ასე უფრო მეტი ადამიანი შეძლებს ჩემს გაგებას. პირველ რიგში, ოჯახის წევრებზე მინდა ვიზრუნო და რამენაირად ვისწავლო ამ კერძის მომზადება მაინც. იმედია ვისწავლი, თორემ ბიბიმბაბი უკვე ჩემი ნაწილი გახდა და მის გარეშე ცხოვრება არ შემიძლია.
პ.ს. არ ვიცი, რამდენად კარგი იდეაა კორეულ სამზარეულოზე აცენტის გაკეთება ამ ბლოგში, ამიტომ ძალიან ხშირ-ხშირადაც ნუ დაელოდებით. მე მართლა რაც გულში ცეცხლს მინთებს, იმაზე ვწერ ხოლმე. ამიტომაა რომ რაიმე თანმიმდევრობას თუ ფორმულას არ მიყვება ჩემი ბლოგი. ზოგი იტყოდა, რომ სხვადასხვა თემების *cough*აჯაფსანდალი*cough* გამომივიდა ეს ბლოგი, მაგრამ ჩემი ლექსიკით ამის ცოტა სხვანაირად თქმა შეიძლება.

სექტემბერი 5, 2014
ბუბუ და კორეა: ნაწილი 18: YG FAMILY-ს კონცერტზე (aka ოცნებები ხდება)

ხვალ ფინალურები მეწყება და სწორედ ამიტომ გადავწყვიტე ახლა დამეწერა ჩემს ცხოვრებაში ერთ-ერთი ყველაზე დასამახსოვრებელი დღის შესახებ.
სანამ კორეულის სწავლას დავიწყებდი და რაც დავიწყე, მას შემდეგაც სულ მინდოდა 2NE1-ს კონცერტის ნახვა და აუხდენელ ოცნებად ვთვლიდი. მაგრამ როცა გავიგე, რომ კორეაში მოვდიოდი, გულში ათასი იმედი გამეფურჩქნა. რას წარმოვიდგენდი, რომ 2NE1ს ვნახავდი კი არა, ჩემი ამქვეყნად უსაყვარლესი კომპანიის ყ ვ ე ლ ა ჩემთვის საყვარელ და სათაყვანებელ შემსრულებელს ვიხილავდი? ბილეთი ხელში რომ დავიჭირე მაშინაც არ მჯეროდა და მარტო მაშინ გავითავისე, ჩემი თვალით როცა ვიხილე (ვინმეს ხომ არ გაგონებთ?). ახლა ვცდილობ გამოვხატო ის შეგრძნება რაც კონცერტის მოგონებისას მიჩნდება, მაგრამ სიტყვებით გადმოცემა მიჭირს. კონცერტის დროს როგორ ვიყავი მაგის თქმაც ძალიან მჭირს. დაახლოებით ასე: ფიზიკურად მკვდარი და სულიერად ამაღლებული. მოკლედ ემოციების გამოხატვა არ გამომდის და ფაქტებს მოგახსენებთ.

ინტერნეტიდან გავიგე, რომ ვისაც კონცერტის ბილეთი ჰქონდა, შეეძლო YG FAMILYს რეპეტიციასაც დასწრებოდა. რაღაც აპლიკაცია შევავსე და სეულის ოლიმპიურ სტადიონთან გავჩნდი სულ მალე. დაახლოებით 1200 კაცი იქნებოდა თავმოყრილი. ორსაათნახევრიანი ლოდინის შემდეგ უკვე მალე უნდა დაგვეწყო შესვლა, რომ შიგნიდან უკვე გაისმა 2NE1-ს რეპეტიციის ხმა. უჰ რა დამბურძგლაა :D შორს ძალიან კარგად ვერ ვხედავ, მაგრამ რაღაც წერტილი დავინახე გისოსებს მიღმა და ეგრევე ვიცანი დარა ^_^ ცოტა ხანში სტადიონზე შესვლაც დავიწყეთ. პირველი TABLO ვიხილეთ და ამას მოყვა მთელი სერია EPIK HIGH-ს შესრულებებისა. EPIK HIGH ძალიან მიყვარს. მაგრამ როცა ვამბობ, რომ 2NE1ს ყველაზე დიდი ფანი ვარ, ნიშნავს, რომ ყველაფერი სხვა მავიწყდება, როცა საქმე 2NE1ს ეხება. გამოვიდნენ… გამოანათეს, რასაც ქვია და პირი დავაღე, გამოვშტერდი. შეასრულეს Go Away და ისეთი შეგრძნება მქონდა (ალბათ ყველას ასეთი შეგრძნება ჰქონდა), რომ თვალებში მიყურებდნენ და დავდნი ღორის ქონივითა. მეთქი ჰა, მომკალით აწი, აღარაფერი დამრჩა სანანებელი თქო (sry ბებოია :(( :D). მაგრამ შემდეგ გამახსენდა, რომ მეორე დღეს ნამდვილი ზეიმი იყო და იმხელა მოლოდინის ტალღამ დამარტყა, გადავყირავდი ლამის.

რეპეტიციაზე დასწრების უფლებამოპოვებული 1200 იღბლიანი (მათ შორის მეც)

სახლში სანამ დავბრუნდი, მაღაზიაში შევიარე და სასუსნავი ვიყიდე მომავალი დღისთვის. მეთქი წავალ დილით პირველივე მატარებელზე, (რომელიც 5:30ზე მოვიდა) იქნებ პირველ-მეორე-მესამე-მეოთხე რიგში მოვხვდე-მეთქი, მაგრამ გულმა “ჭაჭაააანგ” ჰქმნა, როდესაც ვიხილე სიდიდე რიგისა მისა. 10-15 წუთი მოვუნდი რიგის ბოლოში მისვლას და თავიდან დავდექი, შემდეგ დავჯექი და ბოლოს დავწექი. გულის სიღრმეში ვიცოდი, რომ დავაგვიანე: ხალხი წინა დღის დილიდან იკავებდა რიგს და ღამე გარეთ გაათიეს. ესეც კარგი გამოცდილება და თქვენც იცოდეთ: როცა ისეთი პოპულარული კომპანიის კონცერტზე მიდიხართ, როგორიც YG-ა, კონცერტზე 12 საათით ადრე მისვლა არაფერს არ ნიშნავს. მიდით 36 საათით ადრე. შემდეგისთვის გავითვალისწინებ.

ეს სურათი მიკის FBდან მოვიპარე, არ გამთქვათ

რიგში დგომა საკმაოდ დამღლელი იყო და ძალიან რთული, მაგრამ იქვე გავიცანი ერთი იაპონელი ფანი და მასთან საუბარში უფრო სწრაფად გავიდა დრო ^_^ ამ გოგოს მიკი ერქვა და თან ჰქონდა წამოღებული დიიიიდი ჩემოდანი. ინტერვიუც კი ჩამოართვეს ამ ჩემოდანის შესახებ, რათ გინდა კონცერტზე რომ მიგაქვსო. იქვე YGს სხვადასხვა ნივთები იყიდებოდა და ამგენის ყიდვას ვაპირებო. ძალიან ბევრი იქნება და ამ ჩემოდანშიც შეიძლება არ ჩაეტიოსო. მეც დიიიდი სიამოვნებით ვიყიდდი 2NE1ს მაიკებს, სტიკერებს და ათასგვარ აქსესუარებს მაგრამ იცით რა ცეცხლის ფასები ადევს? :D მაიკა ყველაზე იაფი 31 დოლარი ღირდა. მიუხედავად ამისა, როგორც კი შემდეგი თვის სტიპენდიას ავიღებ, ვიყიდი. გავკოტრდები, მაგრამ ვიყიდი. არ შევჭამ და ვიყიდი!

2NE1 – Missing youს ეს მაიკა 38 დოლარი ღირს. სიღარიბე Here I come

საერთოდ, ეს მარტო YGს კონცერტი არ ყოფილა. ესაა ყოველწლიური ფესტივალი, რომელსაც ჰქვია AIA: REAL LIFE NOW FESTIVAL და უამრავი შემსრულებელი გამოდის. ფესტივალი 2 დღე გრძელდება, თუმცა მე მარტო 1 დღის ბილეთის შოვნა შევძელი. პირველ დღეს გამოვიდნენ ისეთი შემსრულებლები, როგორებიც არიან ROCK’N ROLL RADIO, twenty one pilots, miss nine, sidney samson. სიმართლე გითხრათ გარტყმაში არ ვიყავი ვინ ვინ იყო აქედან, ასევე გარტყმაში არ იყო დანარჩენი ხალხიც, გარდა twenty one pilotsისა, რომელთა რამდენიმე ათეული გულშემატკივარიც შევნიშნე. ხალხი რამდენიმე საათის განმავლობაში ფეხზე იდგა ერთ ადგილას, რომ კარგი ადგილი არ დაეკარგა და სცენასთან შედარებით ახლოს ყოფილიყო YGს შემსრულებლების სანახავად. თან ძალიან ცხელოდა და ფიზიკურად ბევრს გაუჭირდა, თუმცა ადგილს არავინ თმობდა. ერთ გოგონას ჩემს წინ გული წაუვიდა დაღლილობის გამო :( ხალხის მესმის, როცა ყველას (განსაკუთრებით კი miss nineსა და sidney samson-ს) უგულისყუროდ მოუსმინეს და ტაშიც მაინცდამაინც არ გამიგია. ერთი სული მქონდა დაესრულებინათ თავიანთი გამოსვლა და ვგრძნობდი, რომ ყველა ჩემნაირად ფიქრობდა, რახან აქა-იქ მესმოდა ამოხვნეშებები. და მოვიდა 18:30 საათიც. უცებ აურა შემოტრიალდა სტადიონზე როგორ, იცით? არა. და ეკრანზე ჩაირთო BIGBANG-ის FANTASTIC BABY ვიდეო. აი მაშინ დასჭექეს ფანებმა ისეთი, გული გამისკდა, რახან მართლა არ ველოდი ასეთ უცაბედ ცვლილებას (უჰ, რა ნობი ვყოფილვარ კონცერტების ამგავში). მაგრამ ეს არაფერია იმ კივილთან, 2NE1ს გამოსვლისას რომ გაისმა და რომელშიც მე დიდი წვლილი შევიტანე :D
სანამ გამოვიდოდნენ, ვფიქრობდი, მეთქი, ასეთი დაღლილი და ფიზიკურად აღარაფერი არ ვარ, ნუთუ შევძლებ და ბოლომდე შევირგებ კონცერტს, რომელიც 4 საათი გაგრძელდება კიდევ? მაგრამ როგორც კი პირველი ნოტი გავიგე სიმღერისა CRUSH, გავგიჟდ-გადავირიე, გასამოძრავებელი ადგილი არ იყო მაგრამ მაინც ვიცეკვე და ვიხტუნე, 7 ლიტრი ოფლი ვღვარე და ხმა ისე ჩავიწყვიტე, დედადია ვერ გაარჩევდა ჩემს ხმას მოხუცებული კაცის ბოხი ხმისგან.

you can kill me now

შემდეგ გამოვიდნენ აკმუ, ბიგბენგი, საი, იჰაი, winnerი, თიმ ბი ანუ ყველა YG-ს წევრი გარდა Se7enისა. სევენის შემოქმედებას არ ვიცნობ და ამიტომ არ დამწყვეტია გული. სოლო სიმღერებიც ბლომად იყო. კონცერტის რაღაც მომენტში სხვათაშორის ვინატრე, რომ ნეტავ არასდროს არ დამთავრდეს-მეთქი, მაგრამ სამწუხაროდ დამთავრდა, ისევე როგორ ყველაფერი ამქვეყნად… ყველაფერი წარმავალია… ამაოება ამაოებაა… ეკლესიასტე…
(უხერხული ხველება) ხოდა სიმღერებს შორის ხადახან იყო შესვენებები და სწორედ ამ დროს ვხვდებოდი, როგორ სასწაულად მწყუროდა, რახან არაფერი დამელია რამდენიმე საათის განმავლობაში და მაშინ გავიგე, რამდენად რთულია უწყლობა. ძალიან რთულია. კინაღამ ხელი ჩავიქნიე ჩემს ადგილზე, რომ შემდეგი სიმღერა დაიწყო და ეგრევე გადამავიწყდა წყალი კი არა საერთოდ ჩემი “მე” რა იყო, არ ვიცოდი. მაგრამ აი ამ შესვენებების დროს მართლა რთული იყო.

რაც ცოტა გამიკვირდა, ისაა, რომ თითქმის ყველას, 80 პროცენტს მაინც ხელში ეჭირა ბიგბენგის “გვირგვინიანი ჯოხი” ( არ ვიცი რა დავარქვა ქართულად. რამე სახელი აქვს?) და ძალიან ცოტას ჩემნაირად – 2NE1ის ფრთებიანი გული. მემგონი WINNERის ახალი მანათობელი ჯოხი უფრო ბევრს ეკავა, ვიდრე 2NE1ისა. ამასთან დაკავშირებით შერეული ემოციები მაქვს: ცოტა გული დამწყდა, რახან მეტ 2NE1ს ფანებს, ანუ BlackJackების წილს ველოდი დამსწრეებში, მაგრამ იმ მხრივ გამიხარდა, რომ 2NE1ს სიმღერების დროს სხვები იმდენად არ გიჟობდნენ და მე რომ ავიწყვიტე ხალხი ცოტათი ჩამომეცალა გვერდებიდან. ასე ვიცეკვე 2NE1ის Can’t Nobody ^_^ კიდევ ერთი ბოროტული მიზეზის გამო გამიხარდა ცოტათი: რაც ნაკლებია ფანების რაოდენობა, მით მეტია ავტოგრაფის შოვნის შესაძლებლობა. ვიცი, რომ ალბათ ვერასდროს ვიშოვი 2NE1ის წევრების ავტოგრაფებს, მაგრამ ასე არ ვფიქრობდი კონცერტზე წასვლაზეც? ამიტომაც გულში იმედის ნაპერწკალი გაჩნდა :D

წითელი წრით აღნიშნულ ადგილას ვიდექი მე დაახლოებით.

და ბოლოს, უნდა ავღნიშნო: ბიგბენგის ფანები არიან გიჟები, გადარეულები! სასწაულად ერთგულნი და თავდადებულნი არიან თავიანთი საყვარელი ჯგუფისთვის. ყველა ჯგუფს ჰყავს ასეთი ფანები, მაგრამ ბიგბენგის შემთხვევაში ამდენი ასეთი ფანი ერთად რომ ვნახე თავმოყრილი, ძალიან გამიხარდა. რიგში დგომისას მესმოდა დებატებები: ~ თუ ბიგბენგის ნამდვილი ფანი ხარ, როგორ შეიძლება მათი “გვირგვინიანი ჯოხი” არ გქონდეს ~ ან ~ ნამდვილი ფანი რიგს არაფრით არ დაარღვევს ~ და მსგავსი ფრაზები. რიგში დრომა ძალიან რთული იყო და მინდა ავღნიშნო, რომ ყველა აზიელი გარეგნობის ადამიანი მოთმინებით იტანდა ამას. მაგრამ გული დამწყდა, როცა უცხოელები მზაკვრული ხერხებით ცდილობდნენ რიგის წინა ადგილებში ჩადგომას, მაშინ, როცა 15 საათის განმავლობაში იცდიდა ზოგი. საქართველოში იმხელა დატვირთვა არ აქვს რიგში დგომას, კორეაში კი ძალიან მნიშვნელოვანია.

^_^ და აი YG-ს ოჯახის წევრთა ნაწილიც! ^_^

მოკლედ რაღა გავაგრძელო და შემდეგზეც აუცილებლად წავალ YGს კონცერტზე, თუ კორეაში ვიქნები. ამჟამად – 1 დღით ან უფრო ადრე!
პ.ს. ვიდეოების გადაღება შევძელი და FBს ჩვენს გვერდზე ავტვირთავ ნელნელა.

აგვისტო 17, 2014