ავტორი: Bubu

გადავწყვიტე ჩემი ერთ-ერთი უსაყვარლესი ტრანსპორტის – მეტროს შესახებ მესაუბრა. გაგაცნობთ სეულის მეტროს – მსოფლიოში სიგრძით პირველს და სადგურების რაოდენობით – მეორეს (ნიუ იორკის მეტროს შემდეგ). სეულის მეტრო გამოყენების სიხშირით მსოფლიოს მეტროთა სამეულში შედის.
ხშირად სწორედ მეტროა სეულში ყველაზე მოსახერხებელი და სწრაფი ტრანსპორტი. სეულის მეტრო ასევე ცნობილია თავისი მოხერხებულობით, სისუფთავით და მომსახურების სისწრაფით. მატარებლები გაუჩერებლად დადიან სადღაც დილის 5:30-დან შუაღამემდე. ყველა სადგურზე შეხვდებით მინიშნებებს როგორც კორეულ, ასევე ინგლისურ ენაზე.
სეულის მეტრო 19 ხაზისგან შედგება, მაგრამ ყველაფერი 1 ხაზით დაიწყო 1974 წელს და ახლა, 2013 წლისთვის სადგურების რაოდენობა 607-ს აღწევს (შედარებისთვის – თბილისის მეტროში 22 სადგურია). ყველა ხაზს თავისი ფერი აქვს. დღესაც მრავალი ახალი სადგური შენდება და კიდევ მრავლის აშენება იგეგმება.
სეულის მეტროში მომხვედრს სასიამოვნო მოულოდნელობები ელოდება. მაგალითად, სკამების გათბობა მატარებლებში. ზამთარში ეს მისწრებაა გათოშილი მგზავრებისთვის, თუმცა ისიც მართალია, რომ თბილად მოკალათებულს ადვილად შეიძლება ჩაგეძინოს და მატარებლიდან ჩამოსვლა დაგეზაროს.
სეულის მეტროს მატარებლებში ყოველთვის შეგიძლიათ თან ტელეფონზე ისაუბროთ და თან იმგზავროთ იმის ფიქრის გარეშე, რომ შეიძლება ნებისმიერ წამს გაგეთიშოთ კავშირი. თუმცა ეს სიახლე არაა – ასე უკვე 10 წელია არის. უკაბელო ინტერნეტთან წვდომა ყოველთვის შეგიძლიათ.
მეტროში უხვადაა ახალი ტექნოლოგიები, რაც ალბათ არ უნდა აკვირვებდეს მკითხველს. თითქმის ყველა ახალ მატარებელში არის ტელევიზორები, რომლებიც სიახლეებს გადმოსცემენ. ასევე, სადგურების შესახებ ინფორმაცია რამდენიმე ენაზეა გადმოცემული (ახლა უკვე თბილისის მეტროშიც, ქართულად და ინგლისურად ^^), რაც მისწრებაა ტურისტებისთვის. სეულის მეტროს უსაფრთხოებაზე ლაპარაკიც კი არ ღირს, რახან სეული მსოფლიოს ერთ-ერთ ყველაზე უსაფრთხო ქალაქადაა აღიარებული (ამის შესახებ დამატებითი ინფორმაცია შეგიძლიათ იხილოთ აქ: http://korea.ge/?p=150). ამის თვალსაჩინოებისთვის შეხედეთ გაჩერებებს. შეუძლებელია მატარებლის წინ გადავარდეს ადამიანი (თუმცა, როგორც ვიცი, ჯერჯერობით ყველა სადგურზე არაა მსგავსად მოწყობილი):

რაც შეეხება ფასს, მგზავრობა 1050 ვონი ჯდება (სადღაც 1 დოლარი). ის ნამდვილად არაა მსოფლიოში ყველაზე იაფი, თუმცა სხვა ქვეყნების მეტროების ფასს რომ შევადაროთ, ძალიან ძვირადაც აღარ მოგვეჩვენება. მაგალითად, ლონდონში სადღაც 4 დოლარი, სტოკჰოლმშიც დაახლოებით ასევე, სან ფრანცისკოში – 3 დოლარი, ვაშინგტონშიც დაახლოებით 3 და ასე შემდეგ.
თუ გსურთ მეტროს სადგურების მდებარეობებისა და სახელების დეტალურად გაგება, შედით საიტზე http://www.korea4expats.com/korean-subways.php
ბონუს ვიდეო:
http://www.youtube.com/watch?v=XCARKKpQN_8

ეს სტატია მეტს გაგაგებინებთ სამხრეთ კორეული სასკოლო სისტემის შესახებ. შეიტყობთ სწავლების რა მეთოდს მიმართავენ მასწავლებლები, როგორ განსხვავდება ქართული სასკოლო სისტემა მისგან, რა შედეგი აქვს ასეთ სისტემას და რატომაა იგი განსაკუთრებული.
დავიწყოთ იმით, რომ ექვსიდან თხუთმეტ წლამდე სკოლა უფასოა საჯარო სკოლებში. სკოლა იყოფა რამდენიმე ეტაპად: დაწყებითი სკოლა (chodeung-hakgyo (초등학교)) – პირველიდან მეექვსე კლასამდე, საშუალო სკოლა (중학교, jung hakgyo) – მეშვიდე-მეცხრე კლასები და უმაღლესი სკოლა (고등학교, godeung hakgyo) – დარჩენილი სამი წელი. ესაა ის დრო, როცა მოსწავლეებმა უნდა მიიღონ განათლება და მოემზადონ უნივერსიტეტში ჩასაბარებლად. კონკურსი ძალიან დიდია, რადგან ვინც პრესტიჟულ სასწავლო დაწესებულებაში მოხვდება, ითვლება, რომ მისთვის ადვილი იქნება სამსახურის შოვნა და საზოგადოებაში ადგილის დამკვიდრება.
დავიწყოთ იმით, თუ რითია სამხრეთ კორეის სასკოლო სისტემა საინტერესო. იგი ძალიან ტვირთავს მოსწავლეს და იგი იძულებული ხდება დღის უმეტესი ნაწილი მეცადინეობაში გაატაროს და ნაკლები დრო დაუთმოს, მაგალითად, საყვარელ საქმიანობას, სპორტს და სხვა. ჩვეულებრივ, სკოლის გაკვეთილების დასრულების შემდეგ მოსწავლეები სწავლას დამატებით სკოლებში აგრძელებენ.
გამოცდების პერიოდი ყველაზე დაძაბულია. ამ დროს მოსწავლეები საშუალოდ 15 საათს უთმობენ დღეში მეცადინეობას და ძილის დროც იშვიათად რჩებათ (ცხადია, ყველაზე არაა აქ საუბარი). განსაკუთრებით დაძაბულია ეროვნული გამოცდების პერიოდი. ამ დროს დაძაბულობა პიკს აღწევს. მთელი ქვეყანა ნერვიულობს. გამოცდის დროს გულშემატკივარ ადამიანთა (არა მარტო მშობელთა, როგორც ჩვენთანაა გავრცელებული) რიცხვში ნებისმიერ მოქალაქეს შეიძლება შეხვდეთ. სახელმწიფოც ცდილობს ხელი შეუწყოს მათ, ვინც გამოცდების წერის პერიოდშია. მაგალითად, მანქანის მძღოლებს საგამოცდო ადგილებთან ეკრძალებათ პიპინი, ან პოლიცია ვალდებულია დაეხმაროს გამოცდის ადგილზე დროზე მისვლაში იმას, ვისაც ეს სჭირდება და ა.შ.
დაძაბული სასწავლო სისტემის შედეგია ის, რომ მოსწავლეები მთლიანად არიან კონცენტრირებულნი კარგ უნივერსიტეტში ჩაბარებასა თუ კონკურსებში გამარჯვებაზე. ამას მოჰყვება გამარჯვებები საერთაშორისო ოლიმპიადებში და სხვადასხვა კონკურსებში.
ძირითადად, მეტი ყურადღება ექცევა ტექნიკურ საგნებსა და ინგლისურს. ფიზკულტურა და ხელოვნება უკანა პლანზე ინაცვლებს. დასავლურ საგანგმანათლებლო სისტემასთან შედარებით, ყურადღება გამახვილებულია დამახსოვრებაზე და შრომაზე, და არა შემოქმედებითობაზე, საკუთარი თავის ძიებაზე.
კიდევ არის რაღაცეები, რაც არაა დასავლეთში გავრცელებული (და არც საქართველოში) და ძირითადად აზიაში ვხვდებით. მაგალითად, სამხრეთ კორეის სკოლებში შეიძლება მოგიწიოთ სხვა, არასაგარეო ფეხსაცმლის ტარება. მოსწავლეები ვალდებულნი არიან თავად დაასუფთავონ საკლასო ოთახი, მოგავონ, მოხეხონ, მასწავლებლის შემოსვლისას უნდა დაიხარონ და ა.შ. და კიდევ, მასწავლებლები ძირითადად არ კითხულობენ სიას.

ახლა კი იხილეთ საინტერესო ვიდეო, სადაც გადმოცემულია, თუ რა სხვაობებია სამხრეთ კორეელსა და ჩრდილოეთ ამერიკელ მოსწავლეებს შორის და რა დადებით და უარყოფითი მხარეები აქვს ასეთ სისტემებს:

ზოგი მშობელი ამბობს, რომ 1-2 შვილის ყოლაც კი ძალიან ძნელია, რახან განათლება ძალიან ძვირი ჯდება. ზოგიერთი მშობლისთვის შვილის უნივერსიტეტში ვერ მოხვედრა დიდი ტრაგედიის ტოლფასია, ამიტომ მოსწავლეები სულ დაძაბულნი არიან და გამუდმებული სტრესი სამხრეთ კორეელი მოსწავლისთვის ჩვეულებრივი ამბავია. ამასთან დაკავშირებით შეგიძლიათ იხილოთ საინტერესო დოკუმენტური ფილმი:

საინტერესო ტრადიცია: ჩვენთან მიღებულია, რომ უნივერსიტეტში წარმატებით ჩაბარების შემთხვევაში, მაგალითად, ფულით ან ავტომანქანით დაასაჩუქრონ შვილი მშობლებმა, ან რამე სხვა სიურპრიზი მოუწყონ, ნათესავებმა საჩუქრები აჩუქონ. სამხრეთ კორეაში ერთ-ერთ ასეთ საჩუქრად პლასტიკური ოპერაცია ითვლება. მშობლები შვილებს წარმატების შემთხვევაში ცხვირის, ყბის და ა.შ. ოპერაციას უფინანსებენ.

ბონუს ვიდეო:

რა აზრის ხართ ასეთ სასკოლო სისტემაზე? შეგვატყობინეთ კომენტარებში ^_^
გმადლობთ ყურადღებისთვის.

სამხრეთ კორეაში ერთ-ერთ ყველაზე ცნობილ ადამიანად ითვლება მოციგურავე იუნა კიმი. ჩემზე, როგორც ფიგურული სრიალის გულშემატკივარზე დიდი შთაბეჭდილება მოახდინა იუნა კიმმა და მისი დახმარებით მოვისმინე პირველი გრძელი კორეული საუბარი. ფიგურული სრიალის მაყურებლებისთვის უცხო არ იქნება ამ სპორტსმენის მიღწევები, თუმცა ამ პოსტის კითხვა ალბათ უფრო მეტს გაგაგებინებთ ყველას.

ეს გოგონა პირველად 2007 წლის მსოფლიო ფიგურული სრიალის ჩემპიონატზე ვნახე, მოკლე პროგრამის სრიალის დროს და ძალიან გამიკვირდა, რადგან მისი სრიალის ტექნიკა აშკარად ძალიან გამორჩეული იყო. იმ დროისათვის იგი 16 წლის იყო და თავის პირველივე მსოფლიო დონის ჩემპიონატზე დაამყარა მსოფლიო რეკორდი. მას ამ სპორტის ყველა კომენტატორი აქებდა და იუნა კიმმა მათი მოლოდინები გაამართლა: აიღო ბრინჯაო, მიუხედავად იმისა, რომ ტრამვირებული ჰქონდა ზურგი. მომავალ წელსაც ანალოგიური შედეგით – ბრინჯაოს მედლით დაუბრუნდა კორეას. მაგრამ რაც მთავარია მან გადააჭარბა ბევრის მოლოდინს: 2010 წლის ზამთრის ოლიმპიურ თამაშებზე მოიპოვა ოქროს მედალი და დაამყარა სამი მსოფლიო რეკორდი: მოკლე პროგრამაში, გრძელ პროგრამაში და ჯამურ საბოლოო ქულაში.

ახლახანს, ანუ 2013 წლის ფიგურული სრიალის მსოფლიო ჩემპიონატზე იუნა კიმმა კვლავ დაგვანახა, რომ ის დღესაც ერთ-ერთი საუკეთესო მოციგურავეა მსოფლიოში. მან ოქროს მედალი მოიპოვა! აი მისი გრძელი და მოკლე პროგრამები:
მოკლე პროგრამა:

გრძელი პროგრამა:

https://www.youtube.com/watch?v=-aUdJVZTC70

იუნა კიმის მიღწევები მხოლოდ სპორტული შეჯიბრებებით როდი შემოიფარგლება. იგი იყო სამხრეთ კორეის წარმომადგენელი 2018 წლის ზამთრის ოლიმპიური თამაშების მასპინძლობისთვის პიონგჩანგის არჩევის დროს. შეგიძლიათ იხილოთ ვიდეო:

ახლა კი იხილეთ მოკლე და გრძელი პროგრამები, რომლებშიც იუნა კიმმა მსოფლიო რეკორდები დაამყარა და ოქროს მედალიც მოიპოვა 2010 წლის ზამთრის ოლიმპიურ თამაშებზე:
მოკლე პროგრამა:

გრძელი პროგრამა:

იუნა კიმის შესახებ დოკუმენტური ფილმების გადაღებაც დაიწყეს. აი ერთ-ერთი მათგანი:

ყველაფერი ნათქვამის გარდა, იგი მონაწილეობს ფიგურული სრიალის შოუებში და სხვადასხვა საქველმოქმედო საქმიანობაში. სამხრეთ კორეაში ფიგურული სრიალის ცნობადობის გაზრდას იუნა კიმს უნდა უმადლოდნენ. ახლა მრავალი ახალგაზრდა ძალიან დიდ დროს ატარებს ყინულზე რომ გახდეს „ახალი იუნა.“
და ბოლოს, იუნა კიმს ჰქონდა საკუთარი გადაცემა სახელწოდებით Kim Yu-na’s Kiss and Cry, სადაც კორეის სხვადასხვა გამოჩენილი ადამიანები გამოდიოდნენ ყინულზე, როდესაც სრიალი სულ ახალი ნასწავლი შეიძლება ჰქონოდათ და ეჯიბრებოდნენ ერთმანეთს. ამ კონკურსში საბოლოოდ გაიმარჯვა f(x)-ის Krystal-მა.
საინტერესო ფაქტები: იუნა კიმს სხვა ყველაფერთან ერთად კარგი ხმაც აქვს და ჩაწერილი აქვს დუეტები ისეთ გამოჩენილ სამხრეთ კორეელებთან, როგორებიც არიან Lee Seung-Gi და IU:

იუნა კიმის ცნობადობის ზრდასთან ერთად იზრდება მასზე მოთხოვნაც მარკეტინგულ საქმიანობაში. ახლა იგი ისეთი ცნობილი კომპანიების სახეა, როგორებიცაა: Hyundai Motor, P&G, Samsung, Ivy Club, Nike, LG, Universal Music, Maeil Dairy და სხვა.

გმადლობთ ყურადღებისთვის.